ಜಗದೊಡೆಯನ ಎರಡನೇ ಮುಖವಾದ ವಾಮದೇವ ಮುಖದಿಂದ ಪ್ರಕಟಿತರಾದ ಶ್ರೀ ಜಗದ್ಗುರು ದಾರುಕಾಚಾರ್ಯ ಭಗವತ್ಪಾದರು ಮದ್ಯಪ್ರದೇಶದ ವಟಕ್ಷೇತ್ರದ ಶ್ರೀ ಸಿದ್ಧೇಶ್ವರ ಲಿಂಗದಲ್ಲಿ ಅವತರಿಸಿ ಉಜ್ಜಯಿನಿ ಮಹಾಕ್ಷೇತ್ರದಲ್ಲಿ ಸದ್ಧರ್ಮ ಸಿಂಹಾಸನ ಮಹಾಸಂಸ್ಥಾನ ಪೀಠವನ್ನು ಸ್ಥಾಪಿಸಿದರು. ಜಲತತ್ವದ ಒಡೆಯರಾಗಿ, ತ್ಯಾಗದ ಸಂಕೇತವಾದ ಕೆಂಪು ವರ್ಣದ ಬಾವುಟವನ್ನು ಹಿಡಿದು ತ್ಯಾಗಮೂರ್ತಿಗಳಾಗಿರುವರು. ಸದ್ಧರ್ಮ ಎಂಬ ಅಂಕಿತವು ಸತ್ಯವಾದ ಧರ್ಮವನ್ನು ಬೋಧಿಸುವುದಾಗಿದೆ ಮತ್ತು ಅದರಂತೆ ಪಾಲಿಸುವುದಾಗಿದೆ. ಪ್ರಸ್ತುತ ಶ್ರೀ ಶ್ರೀ ಶ್ರೀ 1008 ಜಗದ್ಗುರು ಸಿದ್ಧಲಿಂಗ ರಾಜದೇಶಿಕೇಂದ್ರ ಭಗವತ್ಪಾದರ ಧರ್ಮ ಜಾಗೃತಿಯ ಕಾವ್ಯಗಳು ದಿನೇ ದಿನೇ ಉತ್ತಮ ರೂಪ ಪಡೆದುಕೊಂಡು ಸಾಗುತ್ತಲಿದೆ. ಸಕಲರಿಗೂ ಧರ್ಮ-ಸಂಸ್ಕೃತಿಗಳ ಕಂಪು ಇಂಪಾಗುವಂತೆ ಮಾಡಿದೆ.

ಮುಕ್ಕಣ್ಣನ ಮೂರನೇಯ ಅಘೋರ ಮುಖದಿಂದ ಶ್ರೀ ಜಗದ್ಗುರು ಘಂಟಾಕರ್ಣಾಚಾರ್ಯರು ದ್ರಾಕ್ಷಾರಾಮದ ಶ್ರೀ ರಾಮನಾಥ ಲಿಂಗದಿಂದ ಅವತರಿಸಿ ಉತ್ತರಾಂಚಲ ರಾಜ್ಯದ ಕೇದಾರ ಕ್ಷೇತ್ರದಲ್ಲಿ ವೈರಾಗ್ಯ ಸಿಂಹಾಸನ ಮಹಾಸಂಸ್ಥಾನ ಪೀಠವನ್ನು ಕಟ್ಟಿದರು. ಶಿವ-ಜೀವರ ಐಕ್ಯದ ಸನ್ನಿವೇಶದಲ್ಲಿ ಶಿವತತ್ವ ಪ್ರಾಪ್ತಿಗಾಗಿ ಶಿವಜ್ಞಾನ, ಶಿವಧ್ಯಾನ, ಶಿವವ್ರತ, ಶಿವೋಪಾಸನೆ, ಶಿವಪೂಜೆ ಎನ್ನುವ ಪಂಚಪರಿಕರಗಳನ್ನು ಸಾಧಿಸುವಾಗ ಉಂಟಾಗುವ ಅರಿಷಡ್ ವರ್ಗಗಳ, ಸಪ್ತವ್ಯಸನಗಳ ಮತ್ತು ಅಷ್ಟಮದಗಳ ನಿಯಂತ್ರಣವನ್ನು ವೈರಾಗ್ಯದ ಮೂಲಕವಾಗಿ ಗೆದ್ದು ಶಿವನಲ್ಲಿ ಒಂದಾಗುವ ಬಗೆಯನ್ನು ಶ್ರೀ ಪೀಠವು ತಿಳಿಸುತ್ತದೆ. ಪ್ರಸ್ತುತ ಶ್ರೀ ಶ್ರೀ ಶ್ರೀ 1008 ಜಗದ್ಗುರು ರಾವಲ್ ಪದವಿಭೂಷಿತ ಶ್ರೀ ಭೀಮಾಶಂಕರಲಿಂಗ ಶಿವಾಚಾರ್ಯ ಭಗವತ್ಪಾದರ ಅಮೃತ ಸದೃಶ ಧರ್ಮ ಬೋಧಾಮೃತತ್ವದ ಸಾಧನಾ ಕ್ರಮದಿಂದಾಗಿ ಲೋಕೋದ್ಧಾರದ ಕಾರ್ಯಗಳು ಅದ್ದೂರಿಯಾಗಿ ತತ್ವಗಳ ತಳಹದಿಯ ಮೇಲೆ ನಡೆಯುತ್ತಿವೆ.

ಪಶುಪತಿಯ ಚತುರ್ಮುಖದಿಂದ ಉದಯರಾದ ಶ್ರೀ ಜಗದ್ಗುರು ಧೇನುಕರ್ಣಾಚಾರ್ಯರು ಆಂಧ್ರಪ್ರದೇಶ ರಾಜ್ಯದ ಶ್ರೀಶೈಲ ಕ್ಷೇತ್ರದಲ್ಲಿ ಸೂರ್ಯಸಿಂಹಾಸನ ಮಹಾಸಂಸ್ಥಾನ ಪೀಠವನ್ನು ಸ್ಥಾಪಿಸಿದರು. ಜಗತ್ತಿಗೇ ಬೆಳಕು ನೀಡುವ ಸೂರ್ಯನ ತೆರದಿ, ಸೂರ್ಯಸದೃಶವಾದ ಜ್ಞಾನದ ಪ್ರಭೆಯನ್ನು ಜನರ ಅಂಧಕಾರದ ಬದುಕಿಗೆ ನೀಡಿ, ಸುಜ್ಞಾನದ ಚಿತ್ಕಳೆಯನ್ನು ತುಂಬುತ್ತಲಿರುವ ಶ್ರೀ ಪೀಠವು ಮನದ ಮಲೀನತೆಯನ್ನು ತೊಳೆದು, ಸತ್ಯ ಝೇಂಕಾರದ ನಿನಾದವನ್ನು ಬಿತ್ತರಿಸುತ್ತಿದೆ. ಪ್ರಸ್ತುತ ಶ್ರೀ ಶ್ರೀ ಶ್ರೀ 1008 ಜಗದ್ಗುರು ಡಾ. ಚನ್ನಸಿದ್ಧರಾಮ ಪಂಡಿತಾರಾಧ್ಯ ಶಿವಾಚಾರ್ಯ ಭಗವತ್ಪಾದರು ಧರ್ಮದ ಹೆದ್ದಾರಿಯಲ್ಲಿ ಜನರನ್ನು ಸುಸಂಸ್ಕೃತರನ್ನಾಗಿಸಿ ಕರೆದೊಯ್ಯುತ್ತಿದ್ದಾರೆ.

ಈಶ್ವರನ ಐದನೇ ಈಶಾನ ಮುಖದಿಂದ ಉದ್ಭವರಾದ ಶ್ರೀ ಜಗದ್ಗುರು ವಿಶ್ವಕರ್ಣಾಚಾರ್ಯರು ಉತ್ತರಪ್ರದೇಶ ರಾಜ್ಯದ ಕಾಶೀ ಕ್ಷೇತ್ರದ ವಿಶ್ವನಾಥ ಲಿಂಗದಿಂದವತರಿಸಿ, ಅಲ್ಲಿಯೇ ಜ್ಞಾನಸಿಂಹಾಸನ ಮಹಾಸಂಸ್ಥಾನ ಪೀಠವನ್ನು ಸ್ಥಾಪಿಸಿದರು. ಜೀವಾತ್ಮರಿಗೆ ಅಂಟಿದ ಅಜ್ಞಾನದ ಬಂಧವನ್ನು ಬಿಡಿಸಬೇಕಾದರೆ, ಜ್ಞಾನದ ಸ್ವರೂಪನಾದ ಗುರುವಿನ ಮಹಾಮಾರ್ಗದರ್ಶನ ಬೇಕು. ಪ್ರಸ್ತುತ ಶ್ರೀ ಶ್ರೀ ಶ್ರೀ 1008 ಜಗದ್ಗುರು ಡಾ|| ಚಂದ್ರಶೇಖರ ಶಿವಾಚಾರ್ಯ ಭಗವತ್ಪಾದರು ಧರ್ಮದ ಮೂಲವನ್ನು ನಾಡಿನ ಜನರ ಮನ ಮನೆಯತ್ತ ಧಾವಿಸಿ ತಳ-ತಿರುಳನ್ನು ತಿಳಿಸುತ್ತಿರುವರು. ಮಹಾನಂದದ ಬದುಕನ್ನು ದೊರಕಿಸುತ್ತಿರುವರು.